قربنا كتير، يمكن أزيد
من شيء متنافر نسبياً
قَربنا برغم الإحتمالات
قد تحيا حاجات
وتموت بسببها حاجات تانية
أنا عمري ما فكرت لثانية
إيه ممكن يحصل لو خطيت؟
كان لازم بالوقت احسبها
لو حاجة وجودها بيقتلنا
الأفضل -دلوقت- نسيبها
الغلط الأكبر في الحسابات
بنقلبّ ونراجع فيها
وبنعزل روحنا ف قلب خانات
بعد الأيام ما بترميها
بنراجع إيه، وبنحسب إيه؟
أيامنا وعدت وعاشوها
بنفَتحَّ للناس مشاويرنا
بيكملوا فيها ويمشوها
وبنسرد لله تفاصيلنا
والآخر نحلف: غشَوُّها!
مش بقصد أسرد في الحكايات
لو كنت أقصد كات أولى حاجات
أذكر فيها
عن ناس أخدتنا بذنب الغير!
أو عن جناحات حرموها تطير!
عن رفض لفكرة "نبقى بديل"!
الغلط الأكبر في الحسابات
بنفارق ناس ونحنلهم
الغلط ان احنا اللي بننداس!
ونتوه فـ الذكرى وأماكنهم
الغلط الأكبر فـ الحسابات
بنحط الكل فـ الاختبارات
بنحدد للأشخاص سيرهم
الغلط الأكبر فـ الحسابات
بندِّْفَعَّ نْاس فواتير غيرهم!
#الشاعرة_دعاء_النمر
#دعاء_النمر
تعليقات
إرسال تعليق
شاركنا رأيك فى موضوعاتنا .