القط الغامض بقلم محسن سمير

✧ مقدمة ✧

في القرى البعيدة، حيث تختلط الأساطير بالواقع، ويصير الوهم أحيانًا أصدق من الحقيقة، قد يكفي شيء صغير ليقلب حياة الناس رأسًا على عقب.

تمثال من الطين المتحجر، لا يتجاوز ارتفاعه خمسة وعشرين سنتيمترًا، نُحت على هيئة قط نائم بعينين مغمضتين وملامح ساكنة. مجرد قطعة هادئة خرجت مع طين المصرف أثناء التطهير… لكنها كانت الشرارة.

العيون رأت فيه أثرًا فرعونيًا ضائعًا، والخيال رسم له تاريخًا من الذهب والكنوز، فتحول من مجرد حجر إلى "كنز" تتقاتل حوله النفوس.

لكن الحقيقة لم تكن في التمثال نفسه، بل في البشر من حوله: في الجشع حين يستبد، والجهل حين يُعمي، والرغبة العمياء في الثراء السريع مهما كان الثمن.

هذه القصة ليست عن القط النائم، بل عن الإنسان الذي أيقظه بداخله طمع لا ينام.

📖 الفصل الأول

كانت الشمس لسه طالعـة فوق الحقول، والندى مغطي ورق البرسيم والذرة، وصوت الطيور بيملى الجوّ مع نقنقة الفراخ في الجناين. الريحة ريحة طين مبلول بعد ما جرافة الري جت من يومين، وابتدت تطهر المصرف اللي بقاله سنين متسدّ بالهيش والزبالة.

العمال واقفين على طرف المصرف، واحد ماسك كوريك، والتاني بيسند بجوال، والتالت بيزق كومة الطين اللي طلّعتها الجرافة على الجنب. أصواتهم متداخلة مع صوت المكنة الضخمة اللي بتنزل البوكت جوه المية السودا وتطلع حمل الطين وتنزله على البر.

وسط الطين، بين القش المبلول والزجاج المكسور وبقايا علب صفيح، لمعت حاجة غريبة. الأول العُمال افتكروها حجر أملس، لكن مع شمس الصبح، الحتة دي بان عليها لون مختلف، لون بني محروق فيه لمعة مش مألوفة.

"استنى يا عم سيد… ده إيه اللي طالع مع الطين ده؟"
وقف واحد من العمال، مسح وشه من العرق، وقرب. مد إيده، وابتدى يغسل القطعة في الميّة. شكلها بدأ يظهر: جسم صغير، منحوت بإتقان، على هيئة قُط نايم، ديله ملفوف حوالين جسمه ورأسه مرفوعة شوية كأنه صاحي نص صحوة.

الراجل شهق وقال: "ده تمثال يا جدعان… تمثال قط! يمكن يكون من أيام الفراعنة!"
على طول، اتجمّع حواليه اتنين من شباب البلد اللي كانوا معدّين من الترعة: رمزي، شاب فقير بيشتغل باليومية في الحقول، عينه دايمًا على أي فرصة يطلع بيها من ضنك الحياة. جنبه كان سعد، متعلم شوية، واخد دبلوم تجارة، لكنه مش لاقي شغل إلا في الدكان مع عمه. واللي لحق بيهم بعد دقائق كان ممدوح، شاب أكبرهم سنًا، راجع من الغربة في الخليج ولسه حاطط فلوسه في مشروع نص نص.

التلاتة وقفوا يتأملوا التمثال، عيونهم فيها لمعة غير بريئة. رمزي قال:
– "يا ولاد… ده أكيد بيساوي دهب. شوفوا النقش عامل إزاي… دي حاجة فرعونية، أيوة فرعونية، دول القطط عندهم كانت مقدسة!"

سعد بص حوالين وهو يهمس:
– "لو ده فعلاً أثري… إحنا نتقسمه بينا ونسافر نبيعه برّه. نشتري عربية ونفتح مشروع ونقلب حياتنا!"

ممدوح ضحك ضحكة صغيرة، لكن عينه معلقة بالتمثال:
– "اسكتوا… الكلام ده خطر. الآثار دي لو حد عرف إننا لاقيناها ممكن نروح في داهية. بس… لو اتصرفنا بعقل، نعمل منها ثروة."

سكتوا لحظة، والجو حواليهم اتغير. صوت العصافير اختفى، والريحة بقت ريحة طمع وحلم جوا كل واحد. القط النائم في إيد رمزي، لكن العيون كلها عليه، كأنه بينام في الطين من آلاف السنين مستني اللحظة دي عشان يصحي الغرائز اللي جواهم.

العمال كملوا شغلهم بعيد، وما كانش حد واخد باله إن التلاتة وقفين بيمهدوا لبداية صراع هيغيّر كل حاجة

📖 الفصل الثاني

بعد ما العمال رجعوا للمصرف، كان التلاتة قاعدين بعيد تحت شجرة جميز كبيرة. التمثال محطوط قدامهم على قطعة قماش قديمة جابها رمزي بسرعة. كل واحد فيهم بصلّه كأنه شايف فيه مستقبله اللي بيتمناه.

رمزي

رمزي شاب رفيع، عينيه غائرة، هدومه دايمًا عليها بقع طين. أبوه مات من سنين، وساب له أم وأختين صغيرين. كل يوم بيطلع من الفجر يشتغل في أي حقل أو طوبة شغل باليومية. وفي قلبه حِقد ساكت… يشوف العيال التانية لابسين نضيف وراكبين موتوسيكلات، وهو مش لاقي حتى يغير شبشب رجله.

من ساعة ما شاف التمثال، قلبه دق بطريقة مختلفة. حس إن ربنا بعته له، إنه خلاص هيتحول من شاب ملوش قيمة لواحد عنده فلوس وناس تحترمه.

سعد

سعد كان أهدى شوية. لابس قميص مقفول لحد الآخر، شعره متسرّح، بس باين عليه الغُلب. دبلوم تجارة مخلصه من خمس سنين، لكن كل اللي لاقاه يشتغل فيه هو دكان عمه. يقف من الصبح للمغرب يبيع سجاير وكيك وبسكوت، وياخد في الآخر أجر زي العيال. جواه شعور إنه مظلوم، وإنه يستاهل أكتر.

هو مش طماع زي رمزي، لكنه متعطش يثبت نفسه. التمثال بالنسباله كان فرصة يغير القدر اللي مكتوب عليه.

ممدوح

أما ممدوح، فكان أقدمهم. راجل في التلاتينات، وشه مسمّر من شمس الخليج. رجع من هناك بعد عشر سنين ومعاه شوية فلوس، عمل بيهم مشروع مواسير مية وبلاستيك. المشروع ماكملش، وأصحابه خدعوه. بقى عنده بيت صغير جديد بس الفلوس ابتدت تخلص.

ممدوح طول حياته متعوّد يشتغل ويكد، لكن جواه عقدة… إن التعب مش بيوصل للغنى. لما شاف التمثال، حس إن ده ممكن يبقى "التعويض" عن كل اللي راح.

قعدوا التلاتة في صمت شوية، لحد ما رمزي قطع الكلام:

"إحنا لازم نخبيه. ماينفعش حد يشوفه. أنا عندي مكان فالسقف بتاع بيتنا محدش يعرفه."

سعد قال بتردد:

"بس كده خطر… لو البوليس عرف إننا لقينا حاجة وأخفيناها هنروح في ستين داهية."

ممدوح ابتسم بسخرية:

– "إنت يا سعد عايز تفضل واقف في دكان عمك طول عمرك؟ دي فرصتنا. التمثال ده ممكن يساوي ملايين. أنا أعرف ناس في القاهرة… يعرفوا يطلعوه برّه من غير ما حد يعرف."

رمزي عينه لمعت:

– "يبقى خلص الكلام. التمثال بينا إحنا التلاتة، ونتقسم زي الرجالة. سر بينا لحد ما نلاقي المشتري."

مد رمزي إيده كأنه بيطلب "عهد" بينهم. سعد مد إيده بعد تردد، وممدوح ضم إيده بقوة.

لكن، في اللحظة اللي اتلمست فيها الإيدين فوق التمثال، كأن لعنة اتزرعت بينهم. نظراتهم اتغيرت، الثقة اتحولت لريبة… وكل واحد بدأ يتخيل التاني ممكن يسرقه.

الهوى اللي كان بيلعب في ورق الجميز بقى تقيل. والقط النائم، الملقى على قطعة القماش، كان لسه مغمّض عينه، كأنه عارف إن اللعبة ابتدت وإن دمه لسه ما سالش.

📖 الفصل الثالث

مرت أيام قليلة بعد ما خبوا التمثال. الدنيا ماشية في البلد عادي، حصد ودرس، عيال بتجري في الغيطان، نسوان بتخبز عيش على الطوابير، رجالة قاعدة عالقهوة تحكي عن الأسعار والحكومة.

لكن جوّه كل واحد من التلاتة، حاجة كانت بتغلي.

رمزي

رمزي بقى مش هو نفس الواد اللي كان بيقف في الغيط. وهو ماسك الفأس يقطع في الطين، دماغه مشغولة مش باليومية اللي هياخدها، لكن بالفلوس اللي جاياله من التمثال. بقى يتخيل نفسه لابس بدلة وراكب عربية في شوارع المدينة.

حتى أمه حست بتغيره:

– "مالك يا رمزي؟ شكلك سرحان طول الوقت!"

يضحك ويقول:

– "لا يا أمه… بس خلاص، أيامنا الجاية غير اللي فاتت."

يبص في عينها، كأنه عايز يقول لها: "استني وشوفي، ابنك هيبقى باشا."

سعد

سعد كان أهدى، لكن جواه صراع. كل ما يقف في دكان عمه ويشوف الناس داخلة خارجة، يتخيل نفسه صاحب سلسلة محلات كبيرة. يبيع مشروب مستورد، عنده موظفين تحت إيده.

بدأ يتعامل مع الزباين ببرود، حتى مع خطيبته "منى". كانت تيجي تزوره وتشتكي إنه مش مركز معاها.

– "إنت بتفكر في إيه يا سعد؟"

– "في المستقبل… عايز أعمل حاجة كبيرة."

ما قالهاش على السر، لكنه حس إن الوقت قرب.

ممدوح

ممدوح كان مختلف. من يوم ما شاف التمثال وهو بيخطط. جاب ورق وقلم، قعد يحسب: لو التمثال بيساوي نص مليون، يبقى نصيبه كام؟ طب لو باعوه لمليونير في القاهرة؟ طب لو طلع بيساوي ملايين في الخارج؟

بقى يبعد عن الناس. حتى مراته استغربت انعزاله.

– "مالك يا ممدوح؟ راجع من السفر ومش طايق قعدة البيت!"

– "مفيش… كله في دماغي شغل."

لكن في الليل… الليل كان هو العدو. كل واحد فيهم وهو على سريره، يفضل يتقلب ويتخيل:

– "طب ليه أقسمه معاهم؟ أنا اللي لاقيته… أنا اللي أستحقه."

تبدأ الصور تترسم في دماغه: حياته الجديدة، فلوس، سفر، بيوت. وتبدأ مع الصور وساوس: "طب لو خدوه من ورايا؟ طب لو واحد سلّمنا للشرطة؟"

التمثال بقى زي نار صغيرة مستخبية تحت الرماد. مفيش حد شايفها، لكن سخونتها كانت بتزيد يوم بعد يوم.

وفي يوم جمعة، بعد الصلاة، اتجمعوا التلاتة في حوش بيت ممدوح. قفلوا الباب وقعدوا حوالين طبلية خشب، والتمثال محطوط في النص.

ممدوح ابتدى الكلام:

– "لازم نحدد… هنفضل مخبينه لحد إمتى؟"

سعد قال:

– "أنا مع إني نستنى شوية… لو طلعنا بيه دلوقتي ممكن حد يشك فينا."

رمزي ضرب بإيده عالطبلية وقال:

– "أنا زهقت من الانتظار. أنا عايز أبيع وأخلص. كل يوم بيعدي وأنا لسه واقف في الغيط زي العبيط!"

سكتوا، ونظراتهم رايحة جاية. الجو اتوتر. القط النائم قدامهم، لكن العيون كانت مليانة فحيح زي الحيّات.

📖 الفصل الرابع

النهار كان حرّ، والبلد كلها نايمة من بعد الظهر. التلاتة قاعدين في غرفة ضيقة فوق سطح بيت رمزي، الغرفة اللي استخدموها عشان يخبّوا التمثال.

التمثال ملفوف في بطانية قديمة ومتحطوط جوّه كرتونة، محطوط في الركن زي طفل نايم محدش عايز يصحيه.

رمزي كان واقف ووشه معرّق، عينه بتلمع من العصبية:

– "أنا قلت خلاص… التمثال يتباع. فيه تاجر في البلد اللي جنبنا بيشتري أي حاجة ويطلعها للقاهرة. نروحله ونتقسم وخلاص."

سعد هز راسه:

– "إنت فاكر الموضوع لعبة يا رمزي؟ لو ده أثري بجد واتمسكنا… هنتسجن. وبعدين، إنت متأكد إن التاجر مش هيضحك علينا؟"

ممدوح، اللي كان ساكت، شرب نفس طويل من السيجارة وقال:

– "سعد عنده حق. لازم نتصرف بعقل. أنا عندي واحد صاحبي في القاهرة، راجل تقيل، يعرف ناس كبار. نوديهوله… هو يحدد قيمته."

رمزي انفجر:

– "كلام فارغ! كلكم عايزين تلفوا وتدوروا عشان تخلوها في إيدكم. أنا اللي لاقيته، وأنا اللي هاخد حقي كامل."

سعد اتنرفز:

– "إحنا اتفقنا من الأول… التمثال لينا إحنا التلاتة. لو مش عاجبك، يبقى من دلوقتي هنعتبرك عايز تخوننا."

سكتت الغرفة لحظة. العيون متقابلة، والكلام اتقطع. ممدوح حط السيجارة في الطفاية بقوة، وقال بهدوء بارد:

– "اسمعوني كويس… اللي هيفكر يخون التانيين، نهايته هتكون وحشة. التمثال ده مش بس فلوس… ده دم."

الكلمة دي نزلت زي الحجر. "دم". التلاتة حسّوا إنهم دخلوا مرحلة ما ينفعش يراجعوا نفسهم فيها.

في الأيام اللي بعدها، كل واحد بدأ يتصرف لوحده:

رمزي بقى يلف على القهاوي يسأل باللف والدوران عن تجار أنتيكات. بيحاول يلاقي حد يشتري منه التمثال من ورا التانيين.

سعد كتب في كشكوله أرقام ناس في القاهرة يعرفهم من زمايله، يفكر يتواصل معاهم.

ممدوح كان الأذكى: خبّى نسخة مصوّرة من التمثال (صورة بالموبايل) وبعتّها لصاحبه في القاهرة يستفسر عن قيمتها.

وفي ليلة مقمرة، كان رمزي طالع على السطح يتأكد إن التمثال لسه في مكانه. وهو فاتح الكرتونة، لقى ممدوح واقف وراه من غير ما يحس.

ممدوح ابتسم ابتسامة باردة وقال:

– "بتشيّك عليه لوحدك؟ ولا كنت ناوي تاخده وتزوغ؟"

رمزي اتلخبط:

– "إنت بتشك فيا يا ممدوح؟"

– "الشك في دمنا من يوم ما شُفناه."

سعد دخل فجأة من الباب، شاف المشهد وقال:

– "أنا عارف… واحد فينا مش هيستحمل ويبيع التانيين. يومها… الدم هيسيل."

رمزي اتشنج:

– "خلاص! عايزين إيه؟ نقعد نحرّس تمثال طول عمرنا؟ أنا ماعنديش صبر زيكم!"

ممدوح ردّ بحزم:

– "اصبر… أو متصبرش… التمثال مش هيتحرك غير لما أنا أقول. أنا الأكبر، وأنا اللي فاهم اللعبة."

سعد ضحك بسخرية:

– "أيوة يا باشا… يعني إحنا نشتغل عندك كمان؟"

النظرات اتبدلت، والجو بقى خانق.

وفي اللحظة دي… كان التمثال لسه نايم جوّه الكرتونة، لكن جوّه النفوس ما بقاش فيه نوم ولا راحة.

📖 الفصل الخامس

الليالي بدأت تبقى أتقل من النهار. التلاتة مشغولين بالتمثال لدرجة إن حياتهم اليومية بقت باهتة.

رمزي

رمزي بقى قليل النوم. كل ليلة يطلع على السطح ويتخيل نفسه وهو شايل التمثال وبيجري بعيد. كان سامع جواه صوت يقول:

– "خده… هو رزقك. سيبهم، مش هيعملوا غير إنهم يسرقوك."

مرة حتى شاف حلم غريب: إنه شايل التمثال في حضنه، لكن التمثال بيتحوّل لقط حي، والقط بيخربش وشه ويفضل يصرخ لحد ما يصحى مفزوع.

سعد

سعد على الناحية التانية كان بيتعامل بهدوء، لكن جواه خوف متراكم. بقى يشوف رمزي وهو بيبصله بنظرات مريبة، ويحس إن ممدوح بيتصرف كأنه "الزعيم". فكتب في ورقة صغيرة أرقام تليفونات لناس في القاهرة وقال لنفسه:

– "لو حسيت إنهم هيخونوني… هسبقهم."

وبقى يخبّي الورقة تحت مرتبة سريره كأنها كنز.

ممدوح

أما ممدوح فكان أذكى. بدأ يبعد عنهم أحيانًا، يسيبهم يتخانقوا بالكلام، وهو يراقب. في دماغه خطة: يوهمهم إنه ماشي معاهم، وفي اللحظة الصح، ياخد التمثال ويسافر القاهرة.

مرة جاب شنطة سفر قديمة من المخزن ومسحها كويس، وحطها تحت السرير.

---

وفي يوم جمعة بالليل، قعدوا التلاتة في أوضة رمزي. القمر كان مليان، نوره داخل من الشباك، والتمثال متحطوط في النص كالعاده. الجو كان ساكت، لكن العيون بتتكلم.

قال سعد بصوت متوتر:

– "إحنا لازم نخلص… كده هنتجنن. أنا بجد حاسس إن حد فينا بيجهز حاجة."

رمزي رد بعصبية:

– "تقصد مين؟ أنا؟ ولا ممدوح؟"

ممدوح ضحك ضحكة خفيفة، وقال:

– "كلنا بنفكر في نفس الحاجة… بس محدش فينا عنده الجرأة ياخد الخطوة."

سكتوا شوية، وبعدها رمزي قام فجأة، شد التمثال وحطه في حضنه وقال:

– "أنا مش هستنى. أنا هتصرف فيه دلوقتي. إنتو حرّين."

سعد هب واقف وقال:

– "إوعى يا رمزي! هتضيعنا كلكم."

ممدوح وقف بينهم ومد إيده بهدوء:

– "اقعد… لسه وقتك مجاش."

رمزي اتنفس بسرعة، عروقه بارزة، وعينه فيها جنون. لكنه في الآخر رمى التمثال تاني على الطبلية وقال:

– "خلاص… لكن أوعوا تفكروا تضحكوا عليا. اللي هيخوني… والله ما هيشوف النهار."

الجملة دي نزلت زي لعنة. سعد بلع ريقه، وممدوح اكتفى بابتسامة غامضة

ومن اليوم ده، اتأكد كل واحد إن الدم هيسيل. السؤال ماكانش "هل"… السؤال كان "متى؟"

📖 الفصل السادس

الليل كان هادي، والهوا بيلف في شوارع البلد الصغيرة، لكن فوق سطح بيت رمزي كان في عاصفة من نوع تاني.

رمزي نام بدري وهو حاطط التمثال في الكرتونة ومغطيه، قافل عليه بقفل صغير. قلبه ماكنش مطمئن، لكنه قال لنفسه:

– "أنا صاحي من الفجر… محدش يقدر يسبقني."

لكن سعد كان عنده رأي تاني. في نص الليل، وهو متقلب في فرشته، حس إن الفرصة جت. قام بهدوء، لبس جلابيته، وطلع السلم الخشبي اللي يودّي لسطح بيت رمزي.

القمر كان لسه منور، والسطح كله ساكت. سعد مشي على أطراف صوابعه لحد ما وصل للكرتونة. قعد على ركبته، طلع مفك صغير من جيبه، وابتدى يفك القفل.

في اللحظة دي، سمع صوت:

– "إيه اللي بتعمله هنا يا سعد؟"

صوته كان جاي من ورا، غليظ وهادي. التفت بسرعة… لقى ممدوح واقف، ماسك عصا طويلة في إيده.

سعد اتلخبط:

– "أنا… أنا كنت بس… بشوفه."

– "بتشوفه؟ ولا كنت عايز تشيله وتزوغ بيه؟"

ممدوح قرب منه بخطوات تقيلة، والعصا بتخبط في الأرض. سعد حاول يداري خوفه وقال:

– "أنا مش ناوي أخون… لكن رمزي بيخبي علينا. وأنا… أنا مش واثق فيه."

ممدوح ابتسم ابتسامة باردة وقال:

– "كلنا مش واثقين في بعض. بس اللي يفكر يسبقنا… مصيره معروف."

وفي اللحظة دي، باب السطح اتفتح فجأة… وطلع رمزي!

وشه كان مكفهر، وعيونه حمراء من قلة النوم. لما شافهم واقفين عند الكرتونة، انفجر:

– "إيه ده؟! إنتو جايين تسرقوا التمثال مني؟!"

رمزي اندفع زي الوحش، شد سعد من قميصه ووقعه على الأرض. ممدوح حاول يهدّي، لكن رمزي مسك حجر وضرب بيه الأرض جنب راس سعد وهو بيصرخ:

– "اللي يقرب من التمثال ده… أقتله بإيدي!"

السطح كله اتقلب صراخ. الجيران صحوا، لكن محدش قدر يميّز الأصوات. كانوا فاكرينها خناقة شباب عادية.

بعد دقائق طويلة من الصياح والشد والجذب، التلاتة تعبوا. رمزي أخد الكرتونة وحطها في حضنه وهو بيتنفس بسرعة. سعد مرمي على الأرض، وشفته نازفة دم. ممدوح واقف بعيد، عينه بردة، كأنه بيدوّن كل اللي حصل في دماغه.

سكتوا. الصمت رجع يسيطر. لكن كان صمت مرعب.

في اللحظة دي، كل واحد عرف إن التمثال مش هيخرج من بينهم غير على دم.

📖 الفصل الأخير

كانت ليلة خانقة. الصراخ دوى في القرية كلها، والجيران جريوا على بيت رمزي لما سمعوا العراك على السطح. المنظر كان صادم: جسدين ملطخين بالدم، والقاتل واقف ماسك حجر غارق في الدم، عيونه مفزوعة لكن مش مصدق اللي عمله.

الناس هجمت عليه، شدوه من إيده وهو بيقاوم ويصرخ:

– "كانوا عايزين يسرقوه! التمثال… التمثال ليّا أنا!"

لكن محدش سمع تبريره. الجيران ربطوه بالحبال لحد ما جت الشرطة. في دقائق قصيرة، المكان اتحول لضوضاء: فوانيس، همهمة، بكاء، وجثتين ملفوفتين بملاءات بيضا.

القضية تتحول لرأي عام

تاني يوم، الخبر نزل في الجرائد:

"جريمة قتل بسبب تمثال يشتبه أنه أثري في إحدى قرى الصعيد… القاتل أنهى حياة اثنين من أصدقائه طمعًا في الثروة."

الموضوع انتشر كالنار. الصحف ناقشت "الطمع" و"الجهل"، والإعلام سماها "جريمة التمثال".

التحقيقات انتهت بسرعة، والنيابة حولت المتهم للمحاكمة.

جلسة المحكمة

القاعة كانت مليانة عن آخرها. الكل عاوز يعرف: هل التمثال فعلاً أثري ويستحق الدم اللي اتسفك عشانه؟

المفاجأة الأولى: خبير آثار كبير وقف وقال بوضوح:

– "هذا التمثال ليس أثريًا على الإطلاق… إنه عمل حديث، لا يساوي شيئًا."

القاعة اتلخبطت، همهمة وتعجب. المتهم نفسه اتصدم، وشه اتبدل، كأن الأرض انسحبت من تحت رجليه.

لكن المفاجأة الأكبر لسه جاية. واحد من الحضور، رجل خمسيني، طلب من القاضي يتكلم. سمحوا له. قام وقال:

– "أنا أعرف قصة التمثال… والدي اتجوز سنة ١٩٧٠. أخت زوجته كانت فنانة بتحب النحت. عملت له تمثال القط النائم كهدية للزواج، عشان يحطه كديكور في شقته بالإسكندرية."

ابتسم ابتسامة حزينة، وكمل:

– "بعد الزواج، والدي أخد زوجته وسافروا الصعيد. ومع الوقت، خد التمثال معاه. عنده ٣ أولاد اتربوا على عادات البلد. في يوم، لما قرروا يرجعوا الإسكندرية بعد ٢٥ سنة، ابنه الصغير كان بيعتبر التمثال صنم… حرام وجوده. من غير ما يقول لحد، رماه في المصرف اللي قصاد البيت. والدي افتكر إنه ضاع أثناء النقل. والسنين عدت… لحد ما الري طهّر المصرف وطلع التمثال من الطين. ومن هنا، بدأت المأساة."

القاعة اتجمدت. العيون كلها راحت للقاتل. هو نفسه وقع على الأرض وهو بيتمتم:

– "يعني… كل ده… عشان لعبة؟!"

الحكم

القاضي نطق بالحكم:

– "الإعدام شنقًا للمتهم، جزاءً لما ارتكبت يداه."

صرخ القاتل، وقع، حاول يمسك في الحديد، لكن الحرس شدوه. في اللحظة دي، دموعه نزلت مش من الخوف من الموت، لكن من الندم:

– "قتلت أصحابي… عشان حفنة طين."

ما بعد الحكم

الصحف ملأت الصفحات بالعناوين:

"الطمع أعمى عيون ثلاثة فكانت النتيجة دمًا بلا معنى."

"تمثال القط النائم… من ديكور منزلي إلى أداة قتل."

القرية نفسها ما بقتش تخلص من السخرية:

– "هو ده تمثال القط؟! اللي خلى دم يروح عالفاضي؟"

وصار التمثال حكاية تتناقلها الألسن في الأفراح والعزاء، كعبرة على الجهل والجشع.

الحكمة والمشهد الختامي

التمثال رجع لمخزن المحكمة، قطعة غبارية وسط مئات القطع المضبوطة. ما ليهوش قيمة ولا ذكر، لكنه شاهد صامت على دم راح ظلمًا.

الحكمة اللي فضلت في عقول الناس:

"الطمع يقتل قبل أن يُشبع، والجهل يجعل من حفنة طين صنمًا، ومن وهمٍ حقيقةً تسفك الدماء."

آخر مشهد:

التمثال محطوط في عتمة المخزن، ضوء خافت داخل من شباك صغير. القط النائم مازال مغمض العينين، ساكن كأنه نايم…

لكن لو فتح عينه يومًا، يمكن يصرخ على الإنسان:

"صحّوا… الدم مش للتراب."

✧ الخاتمة ✧

انتهت القضية، وأُسدل الستار على مأساة بدأت بتمثال لا قيمة له. القاتل مضى في طريقه إلى المشنقة، يحمل ندمًا أكبر من وزنه، وأهل القرية بقوا يتناقلون الحكاية جيلاً بعد جيل.

لم يعد أحد يتحدث عن التمثال ككنز أثري، بل صار مضربًا للأمثال:

"تمثال القط اللي خلّى الدم يسيل عالفاضي."

في مخزن المحكمة، رقد القط الطيني بارتفاعه الصغير، خمسة وعشرون سنتيمترًا لا أكثر، ساكنًا كما وُجد أول مرة، كأنه لم يرَ ما جرى حوله. لا يعرف أنه صار بطل مأساة بشرية، ولا أنه سُمي في الصحف "القط الغامض".

لكن الدرس ظل باقيًا:

إن الطمع لا يترك وراءه إلا الخراب، والجهل قد يصنع من حفنة طين أسطورة، ومن وهمٍ حقيقة تُسفك بسببها الدماء.

وفي صمت المخزن، بقي القط نائمًا…

ربما يحلم بعالمٍ أنقى، لا يريق فيه الإنسان دم أخيه من أجل وهمٍ، ولا يعبد فيه البشر ترابًا على هيئة صنم.