عزيزتى الدودة اللى حتاكلنى
احب اقولك لازم تفكرى كويس اووووى قبل ما تيجى وتاكلى حد مصرى
يا ست الكل الكائن المصرى من اول ما بيتولد وهو بياكل حاجات عجيبة خدى عندك
1\ وهو لسه بيزحف بياكل كل حاجة تطولها ايده واعنى بكلمة اى حاجة يعنى اى حاجة ومتقوليش ايه القرف ده هو كائن بدايته كده
2\ احنا بقى اول ما بيشتغل فى الاكل نبدأ نحشى محمرات بزيوت مهدرجة معاد تصنيعها عدة مرات وده برده عاااااادى متقوليش ازاى دى اسمها اعادة التصنيع
3\ ربنا يكرمه بقى ويبدأ يشترى دا شيبسيات على بييييبس على جيلى كولا على حاجات مالهاش اسم على حاجات تودى السجن اللىعملها واللى بيبيعها واللى بياكلها
4\ احنا بقى الكبار بنبقى مشغولين فبنشترى يا ديلفرى اكل معموووول بره من اجود انواع بقايا الاكل بالمطاعم قبل ما يترمى للقطط ( احتمال هى شخصيا تكون من ضمن اجود القوائم ) او نجيب بقى البورجر و السوووجوق والهووت دوج ههههههههههه وربنا كل ما اجى اترجم معناه اضحك ( كيس كلب سخن لو سمحت ) المهم يا دودة ياختى لو عرفتى تطلعى حتى لحماية من الحاجات دى تبقى شطورة وتستاهلى تاكلينا احنا شخصيا منعرفش غير انها معجنات بنكهة اللحمة هههههههههه
5\ خدى بقى ان الحكومة الله ي..* & ^ $ > .... كل ماتقدمه لنا من خدمات زى الفل
مياه ......ما اقولكيش تحمل كل انواع الفطريات والجراثيم بس احنا بنستعملها كمضاد حيوى
الهواء ...... زى الفل بس يادوبك حبة عادم سيارات على دخان مصانع على حرق قش وقمامة يعنى حاجات بسيطة بس احنا بنتعامل معاها كموسعات للشعب الهوائية كل مانكح بنفتح الشعب والحويصلات الرئوية لاتقلقى يا دودتى
الاكل ..... ابدا حاجات بسيطة مسرطنة علشان الدود اللى زيكم ياكله ويموت بس احنا بنى ادمين طماعين ودا حال الانسان بناخد كل المواد المسرطنة ونخزنها فى اجسامنا علشان بنطمع فيها فمتقلقيش خالص مش حيحصلكم حاجة احنا مخزنينه الخوف بقى عليكم لما ننتحر او ننشنق او ننقتل او نفيص خلى بالكم اللى جوه كله مركزززززز
6\ الامراض
وفعلا بعتذرلك انتى وكل الدودات صديقتك لاننا بنحمل حبة امراض بتستلزم اننا نشيل اعضاء \ نغيرها \ نستغنى عنها
يعنى بنوصلكم غيار خارجى بس انما الفردة الداخلى بتكون متهربة
7\ بقى ودى اخر حاجة
لو اندفنا وناويين تاكلونا بعد الكلام ده كله ماتستنووووش لان فيه ناس بتطمع فى البواقى بتاعتنا وبياخدوها يصدروها لاماكن اخرى
من الاخر يا تلحقونا يا متلحقوناش
وكان فى اقتراح اننا منخافش على الدوده لأنها أساسا عايشه جوانا وإتعودت على أكلنا الخوف للواحد يموت جنب واحد من حته نضيفه ودوده من عندنا تعزم الدود بتاعه أهو كده بقى سمعة دودنا هتدمر ويبقى ملناش لازمه احياء وموتى هخليهم يكتبوا على الكفن مخصوص للدود المصرى وعلى هذا
وعلشان احنا لازم نحافظ على مستوى دودنا وسمعته منقدرش نحطم سمعة دودنا وسط دود العالم طبعا احنا لما نكتب على الكفن تفتكروا الدود حيعرف يقراه ويفهمه ............... يالهوووووووى مصيبة ليقولوا ادخال لغة الدود للتعليم المصرى بعد ريادتنا فى التعليم فى تقرير دافوس ويلزموا كل طالب مجبش درجة كويسة بتعليم 5 دودات وكل معلم نتيجة فصله اقل من 70% بتعليم دودة عن كل طالب عنده ههههههههههههه يستاهلوا دول هيتفحتوا شكرا يا دكتور على اقتراحك منتحرمش ادي المعلم اللى حيشرب الليلة بس أهم حاجه يعملوا كادر لمعلمى الدود وكل مدرسه ودودها واللى يتفوق نسفره بعثه لمقابر أوروبا ولهذا فقد تقرر ان يدخل الاقتراح قيد المشاورة فى مجلس الوزراء وحيتصدق عليه من مجلس الشعب بعد ما يتم انتخابه بعد عمر طويل ولذلك ولحين التصديق على قرارات مجلس الوزرا سيقوم المعلم بتعليم الدود على ان يكون مستوى اى دودة لا يقل عن 50% تفك الخط يعنى وعلى هذا فقد تم اقرار وحدة تعليم الدود بكل مديرية وعلى كل مديرية ان تنفذ القرار باداراتها المعتمدة وتعيين وحدات بكل ادارة يقوم احد المتخصصين بالدود بالاشراف عليه ونقترح ان يكون من مصنعى المش ابو دوده وعلى ان يكون شعار الوحدة المقترحة ( مايقعد على المداود الا شر البقر ) هذا والله ولى التوفيق وعلى لله اشوف اعتراض من حد دا قرار ديمقراطى طيب وبالنسبة للمحاسبة علي التقصير حتكون النيابة الادارية من الدود ابو مش وﻻمن العادي؟؟؟؟؟؟
نقدر نطمنكم يا شعبنا الحبيب ان المحاسبة هتكون بكوبونات ذكية تتصرف من الزلعة مباشرة وعلى حسب طول الدودة حيكون الحساب ومفيش حاجة اسمها تقصير احنا فى بلد حضارته اد كدهوووو تقوليلى تقصير؟ مافيش غير تطويل يا استاذة وشكلك كده حنمسكك السلك عريان ..... اااااسفة وحدة الدود ويمكن نطلب منك خطة جودة للدود واستراتيجية مقترحة للتعليم وكمان عاوزين منك دراسة مستفيضة فى لماذا يسلك الدود داااائما السلوك الملتوى اثناء تحركاته المريبة
دودتى حبيبتى بالف هنا وشفا عليكى الكائن المصرى
جميلة يا أستاذة علا ربنا يباركلك
ردحذفأزال المؤلف هذا التعليق.
ردحذفجميلة اوووى
ردحذف