انا الدليل للشاعرة دعاء عبد الوهاب

أنا الدليل ..

أنا الدم اللى سال ع الأرض

ما استكفِـت ..

أنا العين اللى صابها الغدر

و اتصفِّـت ..

أنا الأم اللى حرقوا فؤادها ع الغالى

و لبست شال محنِّى بدمه و اتدفِّـت ..

أنا الدليل ..

أنا المخنوق ب سم الغاز على الكوبرى ..

أنا المضروب ب مِية خرطوش على ضهرى ..

أنا اللى العمر راح محنة ورا محنة ..

و قلت شاريكى ولا مرة نفَد صبرى ..

أنا المجنى عليه و اليوم بقيت جانى ..

واللى قتلنى برئ و عيونه ناكرانى ..

خرجوا الديابة من القفص أحرااااار ...

و انا اللى لسه سجين محبوس ف أكفانى ..

يا نكسة كانت ف التاريخ و اليوم بقِت وكسة ..

يا قلوب و متلونة بالغدر و الخِســة ..

لو كنتوا فاكرين حلمنا ممكن يموت ..

متفرحوووووش ..

نـــار القصاص و الدم هتشتعل لســه

‫#‏القتلة_رجعوا_القصور_والشهدا_جوه_القبور‬