ادعيلى يامة
اجيب النصر واجيلك
امسح بيه دموع عينك
انور ضلام ليلك
ازرع سنابل قمحك
ارويها بمواويلك
اكحل عيونك بفرحة
تنسيكى احزانك
ياست الكل يا عشقانا
نورك ضى فى سمانا
دعاكى رحمة من رب الكون
صاحب الملك والملكوت
رب الكل هو مولانا
.........................
روح يا ضنايا روح
روح وانا قاعدة مستنية
ترجعلى ومعاك اغلى هدية
هديتى نصرك
من بعد صبرك
هديتى عزك
من بعد ذلك
وشماتة العدا فيا
روح ومتنساش
ان سيــــــــنا
بدم اخوك مروية
روحه بتنادى
ف الجنة مستنية
اسمع ياضى العين
حقولك اللى فى صدرى
كتماه بقالى سنين
اخوك كان فجرى
اللى منور على
توبى الحزين
كان نورى وشمسى
كان عكازى الامين
كان احساسى
اللى احسه
كانوا ينادونى باسمه
قتلوه الخناذير
هتجبلى تاره
والغادر توقف قباله
تشيل من جوايا الانين
.......................
رايح يا امة رايح
رايح والغل جوايا طارح
رايح وواخد معاى توبى
توب ابيض مطرز
بدم من عروقى
يا امة روح اخويا بتنادى
شايفها فى السما
طايرة عليا بتحادى
خد بتارى
طفى نارى
وعروستك هنا مستنية
حورية م الجنة
بالنور مطلية
يا امة الحلم حيكمل
والجر حيدمل
واجيلك باغلى هدية
...............................
روح يا ضنايا روح
مش حبكى ولا انوح
حكفكف دمع العيون
وابطل لطم الخدود
نصرك م السما موعود
بشرى م لاولد له ولا مولود
روح ياضنايا روح
وانا حستناك حدى التوتة
تحكلى واحكيلها حدوتة
حدوتة ابوك وجدك
وتاريخ بقية اهلك
وناس كتر قبلك
روح ولو مت
حخادك للجنة معدية
وأطلق زغرودة
ف الفضا مدوية
ما هو موتك
دا شرف ليا
ماهو موتد
دا شرف ليا
................
يا امة انا شايف
فى الصف واقف
احمد ومحمد
وجرجس وواصف
الكل صافف
ف الشدة متكاتف
عاقد العزم والنية
وجوامع ساجدة
وكنايس داقة
وحدة متصانة
وقلوب بالايمان
خاشعة ومليانة
شفايف باسمة
على سنانها جاذة
حالفة تحمل
راية الانتصار
تخلص م عار الانكسار
تضرب بيد قوية
صاروخ مدفع وبندقية
......................
سلام الله
على ولاد مصر الابطال
سلام الله على رجالة
حالفة تاخد التار
للموت شادة حزامها
ناوية الهزيمة
تمحى اثارها
ونجمة هالة
ف السما طايرة
تبشر ببداية الانتصار
ماهى سينا
يا امة موعودة
تخلص على
ترابها الحدوتة
طوبة ومشير وبائونة
تواريخ ثابتة
تحكى ماضينا
هكسوس مغول وتتار
النصر ماهوش
قول ولا افتخار
النصر ترسمه
همم وسواعد
واستعانة بالواحد البارئ
قرينا ف الكتب والمدارس
شفنا ف وشوش الخلايق
مكتوب ع حيطان المعابد
أن مصر غازيها هالك
تفنى ع بابها الممالك
............................
سامعة يا مة
صوت الراديو والاذاعة
دى حقيقة يا امة
مش اشاعة
سامعة صوت
الميكرفون ف المساجد
عبرنا القنال
خطينا الحواجز
دمرنا بارليف
والساتر الترابى
حجبلك كام اسير
بيهم تحدى السواقى
شايفة يا امة
دم اخويا مارحش فاضى
دم اخويا مارحش فاضى
تعليقات
إرسال تعليق
شاركنا رأيك فى موضوعاتنا .