كلمة

 كان يوم عادي، أو المفروض يكون. هي جاية مع صحبتها، ماشية جنبها بخطى هادية، مش لابسة بهرجة، مش بتحاول تلفت نظر، لكن جواها في طيبة ونقاء يخلي أي حد يطمن لها. بتحب صحبتها بصدق، وبتيجي معاها في أي مكان من غير ما تسأل أو تتردد. بتحس إنها سندها، ضهرها، وإن وجودها بيخليها أقوى.

هو كان مستني. عنيه بتدور على حبيبته، وشه مليان فرحة، وابتسامته واسعة كأنه نسي كل حاجة في الدنيا غيرها. شافهم من بعيد، والبسمة فضلت موجودة، لكن لما قربوا، الكلمة خرجت: "إنتي جيباها معاكي تحرسك؟"

ضحكة خفيفة، كأنها نكتة بريئة. يمكن كان بيهزر، يمكن كان شايفها صلبة، وقفتها فيها وقار، كلامها قليل ونبرتها رزينة. لكن الكلمة، رغم بساطتها، وقعت زي حجر تقيل على قلبها. في لحظتها حسّت إنها تقيلة، مش محبوبة، ولا حتى ملحوظة بحد ذاتها. حسّت إنها موجودة بس كوظيفة، مش كإنسانة، وإنها ظهرت في الصورة عشان تحمي مش عشان تُحب.

سألت نفسها في لحظة: "هو أنا كده فعلاً؟ ناشفة؟ جامدة؟ هو كل اللي حواليّ شايفيني كده؟ طب فين اللي جوايا؟ فين الحنية اللي بحس بيها وما بعرفش أقولها؟ فين أنا؟"

اتلخبطت مشاعرها. ابتدت تراجع كل تصرفاتها. يمكن كانت ساكتة أكتر من اللازم، يمكن بتضحك قليل، يمكن مش بتعرف تعبر زي ما البنات التانيين بيعرفوا. بس هو ده معناه إنها لازم تكون بس في الخلفية؟ تحرس؟ تقف ساكتة وتتحسب من ضمن العدة؟

رجعت البيت، دخلت أوضتها، قفلت الباب، وقعدت على طرف السرير. مش قادرة تعيط، ومش قادرة تحكي. بس حاسّة إيد بتضغط على صدرها، وجواها صوت بيصرخ "أنا مش كده… أنا مش كده!"

في العالم اللي حوالينا، كل الناس بتتكلم، وبتضحك، وبتفتي، ومحدش بيفكر قد إيه الكلمة ممكن توجع. الكلمة مش دايمًا بتمر، أوقات بتمشي جوه الروح، وتسيب علامة. كلمة واحدة ممكن تخلي بني آدم يعيد حساباته كلها، ممكن تهز ثقته اللي فضل يبني فيها سنين، ممكن تخلّيه يشوف نفسه بشكل مشوه، ويفضل يعافر عشان يصدق إنه يستحق يتحب.

كام مرة ضحكنا على حد بنية الهزار، وسبنا جواه كسر؟ كام بنت فقدت احترامها لروحها بسبب تعليق شكله بسيط؟ كام شاب قفل على نفسه عشان كلمة عن طريقته أو ملامحه أو صوته؟ الحقيقة إن الكلام بيعيش، بيدخل في الذاكرة ويفضل هناك، يظهر فجأة بعد سنين، في لحظة ضعف، في مراية، في صورة قديمة، في موقف مشابه. وجملة تعدي منك في ثانية، ممكن تكون سبب في انهيار حد تاني من جوه.

احنا بنتعامل مع الكلام كأنه هوا، لكنه في الحقيقة سلاح. سلاح مش بيبان، بس بيقطع، بيشوه، وأحيانًا بيقتل ثقة إنسان بنفسه. علشان كده، لما تتكلم، خليك طيب. لما تهزر، خليك واعي. ولما تحس إن الكلمة خرجت غلط، ارجع واعتذر، لأن أحيانًا اللي بنقوله بيرن في ودن غيرنا طول العمر.

الكلمة جرح، أو دوى. انت اللي بتختار تكون إيه في حياة اللي حواليك