أقبل على القهوة متأففاً و أتخذ كرسياً..* خدني يا رب. كان بجانبه رجل مسن جالس على كرسي و بجانبه قهوته و معدات للرسم و يرسم على لوحة مثبتة و هو يدندن..ثم توقف الرجل عن الدندنة و لم يترك فرشته و لم يحرك عينيه من على اللوحة..# مالك؟
*أنا؟! # آه اللي بتدعي على نفسك. *عيشة قرف و حاجة هباب..إمبارح زي النهاردة..وقتي بيتسحب و أنا عاجز!!... فضحك الرجل
# عاجز؟!
*بتضحك يا عم الحج..أنا ولا حاجة و الدنيا معنداني..كل حاجة ضدي..أنا مش لاقيني..حاسس أني مليش لازمة و مش لاقي حد يفهمني و ملل و زهق و قرف بس يا حج الله يخليك.. و الرجل ينصت و لا يحرك عينيه من على اللوحة بل هو بكامل تركيزه ثم يأتي بأنبوب ألوان من على حجره و قلم رصاص و يمسكهما بيده.. # أيه دول؟! *ده أزرق و ده قلم رصاص!! # منا عارف يعني بيمثلولك أيه؟ *لون و قلم!! # بس! * مش فاهم؟ فنظر الرجل إلى ما يمسك به ثم أغلق عليهما يده و تنهد كأنهما شئ مقدس يؤمن به!! # إمال أنا ليه شايف اللون ده سما من فوقي مش عارف أولها من أخرها..و بحر موجه عالي سامع ف ودني صدى صوته. ثم أمسك بالقلم فقط. # أما ده..نقطة و من أول السطر..جواب عاشق لسه موصلش..ملامح شخص في طريقها للإكتمال.. ثم وضعهما على الطاولة بجانبه.. # أو لون و قلم.
* عظيم! قبل كلامك مكنش ليا لازمة دلوقتي أنا عاجز فاشل مليش لازمة خالص. فضحك الرجل # عاجز تاني! عارف يبقوا لون و قلم إمتى..لو فضلنا شايفنهم كدا! جماد و بس مش سبب و رمز و حكاية..طيب أنا مش هسألك إنت أيه لأنك هتقولي فاشل مليش لازمة الدنيا ملطشة معاه و عاجز. ثم يضحك..# أنت ذكرى من إمبارح و بكرة اللي جي و زاير ف حلم و ضحكة فوش حزين إفتكرك بسبب نكتة حلوة قلتها و أمان اتنين شايفين نفسهم بيتعكزوا عليك لما يكبروا و نص ناقص فقلب واحدة هتكمل حياتها بيك و فرد بيكمل لمة صحاب و قاعد على قهوة بتكسب صبي غلبان داير بكوبايت عالتارابيزات و سبب علم فحياة روح و لو مش قاصد و حكاية هتتحكي و أنت مش موجود و حلم شايف فيك العاجز إنك فيوم هتحققه.. فنظر له الرجل بإستغراب و عينيه متسعتين و قلبه تتسارع ضرباته # هه..يلا بقى أنا هقوم..ثم دعى الرجل المسن صبي القهوجي ليجمع له أغراضه و لوحته التي سيكملها غداً و أمسك بعصا بجانبه و بدأ يرفع العصى و يحسس بها و هو ينظر في إتجاه واحد. # آه صحيح أنت مش هتبقى عاجز إلا لو آمنت إنك عاجز غير كده إنت مستحيل على لسان البشر في طريقه عشان يتحقق..
و مضى الرجل الأعمى في طريقه!!!
تعليقات
إرسال تعليق
شاركنا رأيك فى موضوعاتنا .