مطلوب عريس
مطلوب عريس للشّمس ويكون من الأشراف
راجل لبكره وأمس م الحق عمره ما خاف
والمهر هو العدل والصدق والانصاف
******
عروستنا من عيله
ومعاها تركه كمان
حواليها هلّيله م الحاشيه والعرسان
***********
أول عريس جالها قالو لها ده عصامي
راجل بسيط جدا وف خلقه كان سامي
نهب الغنيمه وهرب طلع الغبي .... حرامي
************
تاني عريس ده اهبل كان أكبر اخواته
ما يخطّي ولا خطوه الاّ مع اخواته
واخواته دوله شلّه قامو أسّسو شركه
واتلمّو يا ماشالله بيقسّموا التّركه
فطبيعي يختلفوا ويزيدوا ف طمعهم
غارو بأيامهم رّبك ما يرجعهم
*******
عروستنا صرخت قهر قالت ما بزياده
بقالنا شوف كام شهر قهوتنا ليه ساده؟
نفسي بقا أفرح واقفل عيوني وانام
مالقيتش ليه مطرح؟ والام تجر الآم؟
****************
تالت جدع جالها كان ف الكلام أستاذ
وكلامه مترتّب تسمع تقول أعجاز
يوعدها بالجنّه ويقولّها ارتاحي
واتغطّي بالحنّه وفداكي أفراحي
وأدينا بنطبطب ع جرحنا بشويش
نتمنّي سبّوبه أو حتّي لقمة عيش
*********
حيساوي ما بين النّاس ويحكمها ...بعداله
مش ناس عايشه ف قصور والباقي ف زّباله
******
أسمعنا يا فارس وما دمت انت العريس
خليك لنا حارس خليك لنا أنيس
واقلع جذور الشّر أحرق ولاد ابليس
تعليقات
إرسال تعليق
شاركنا رأيك فى موضوعاتنا .