خلينا في الحب بشر !!
______________________
إن كنت محتاج لرحمة الإله فأنا مش إله
وإن كنت محتاج طبطبة على كتف مش طايل نجاة
فأنا ايدي مش أسلوب حياة
ولا انت رملة بتشرب حنان ومتقولش لا
حتى النبات اللي بنخاف عليه ونرعاه
طرحه أضعاف أضعاف البذار
وانا ازرع فيك اهتمام اجني اهمال
بتأجل ازاي الثمار ؟
قولي ..
ازاي منك انجرح ومقولش آه
واجري عليك بالفرح لمنتهاه
ولو مرة صابني في يوم تعب
ألاقي الرحمة عندك
محبوسة بين أسوار
ارحمني زي ما برحمك
وارويني من نبعك حياة
خلينا في الحب بشر
صعبة شغلانة الإله !!
تعليقات
إرسال تعليق
شاركنا رأيك فى موضوعاتنا .