أنا هافرح ..دعاء عبد الوهااب

أنا هافرح ..
بس مش هافرح أوى ..
و هاحزن ..
بس مش هاحزن أوى ..
حالة كده مافيهاش يقين ..
ولا انت رايح للشمال ..
و لا اتجاهك لليمين ..
رافض تكون وسط البكا ..
و مش مصدق برضو ضحك المبسوطين ..

حاجة سخيفة و مؤلمة ..
الدم ينزف من هنا ..
تلاقى ناس بيعددوا ..
و ناس تمام و مهيَّصين ..
حاجة سخيفة و مؤلمة ..
العدل شكل المظلمة ..
الحق شمس مغيِّمة ..
و الصح أصبح بين و بين ..
تفضل كده ..
الفرحة مش بتفرَّحك ..
و الحزن مبقاش يجرحك ..
ولا انت عشت كما يجب ..
و لا مُت ضمن الميتين !!