نفوس مزحومه بالأحزان
وواد غلبان
بيتحامى فى رصيف الخوف
وفل يطوف
فى إيد أموره مطحونه
بصوت باكى
بتنده فى حوارى الشوق
معايه الفل للعشاق
وواد مشتاق
بعيد قاعد على المرسى
ولا بيرسى
يشوف الليل بينده له
يصاحب كام قمر واهم
فيجى ضباب و يعمى
عيونه كالعاده
وصوت عربيه الإسعاف
بيصرخ جوه قلب الست
وهى واقفه ع الخرشوف
مفكرها بوادع روحها
معيشها فى سنين الخوف
وبياع السنين بيدوس
على قفص الخضار الناى
وبيعدى العجل ظالم
ومين يعرف غير العالم
لعل إن القفص مقصود
عيون الدود
مهيش رحمه
مع إن الهوى زحمه
مع إن الولد مطحون
لكنه قانون
وناوى يدوس على روحى
وأنا ورحى
مابين الناس
نشوف نسمع ونتألم
وصوت الجرح يتكلم
كلام بمرار
كلام حاسه بيصرخ نار
على جدار الرصيف أياه
قاعد جنب الولد أياه
أقول الآه
ومين سامع
غير المسكين
ويمسح دمعتى هو
ومن جوه ياعينى حزين
ومين يسمع
ومين يفهم
أنادى ع مين
وكل السيرك
فى مشاغله
وأنا شاغله بحدوته
سمعها خمسميت مره
وقول يسمعنى بالمره
لكن على مين
ومين سامع ياواد ليه
ومين هيلحن الأغنيه
غيرك أنت
بلحن حزين
تعليقات
إرسال تعليق
شاركنا رأيك فى موضوعاتنا .