" صندوق الذكريات" بقلم الشاعره شاديه ياسين
من بعد ما قلبي مات
و مات فيه الشعور
وحشتني كتير حاجات
كانت سبب السرور
عيلتي صحابي و جيراني
أيام مش راجعة تاني
لما كنا كلنا مع بعض موجودين
فاتت سنين كتيره دلوقتي
فاضلي مين
اللي فارق و هاجر
و مسبش غير أنين
دورت و في حياتي
علي أجمل عمر فات
ملقتش غير عذابي
و صندوق الذكريات
أحساس كتير أليم
وجع قلبي الحنين
لناس كانت هنا
رسمنا حلمنا
مع بعض أيام ما كنا
لسه صغيرين
و في الصندوق لاقيت
صور جوابات و بيت
كانت محاوطه حيطانو
أخواتي و أبويا و أمي
قبل القدر ما يخوني
و ياخد كل شيء
أبويا كتير وحشني
و وحشني شدتو
لما كان بيخاف عليا
و يدوس علي رقتو
علمني كتير حاجات
مكنش لسه مااات
و لا كان لسه قلبي
حس بوحدتو
و الصورة دي لأختي
وخدنها أحنا سوا
أنا لسه فاكره يومها
حكايتنا لبعضنا
كانت هي أكبر مني
و حنانها كان أسرني
دلوقتي حبيبتي ماتت
و روحي غايبه عني
و دي صوره صديقتي
أقربلي مني أنا
كانت كاتبه عليها
يخلينا لبعضنا
و هاجرت من سنين
دلوقتي هي فين
كلو فاتني لجرحي
و لذكري مؤلمه
و دي صوره حبيبي
اللي ظلمني ف الهوا
وعدني يبقي ليا
و فارق من سنه
يا صندوقي الحزين
جواك كل الأنين
عمري طفولتي و شبابي
و عيوني المجروحين
من بعد ما قلبي مات
و مات فيه الشعور
وحشتني كتير حاجات
كانت سبب السرور
عيلتي صحابي و جيراني
أيام مش راجعة تاني
لما كنا كلنا مع بعض موجودين..
تعليقات
إرسال تعليق
شاركنا رأيك فى موضوعاتنا .