دقات الساعةبقلم محسن سمير... محسن الورداني
دقّات الساعة
الساعة بتدقّ...
تجرح في الحيطانْ وتشقّ الصمتْ
تعدّي على الوشوش اللي نامتْ بدري
والعيون اللي لسه بتحرس الحلمْ
الساعة بتدقّ...
تسرقْ العمرْ من جيوب الناسْ
تلفّ وتلفّ.. وتاخد ملامحنا معاها
وتخلّف وراها ضحكة قديمةْ
وصورةْ بتتآكل فـ بروازْ النسيانْ
الساعة بتدقّ...
تقطع فـ سيرةْ اللي راحواْ بدري
وتدوّر فـ وشوشِ الغايبينْ
كأنّها بتقولْ:
"محدّش يقدر يحبِس الوقتْ
ولا حدّ يقدر يرجّع السنينْ"
الساعة بتدقّ...
تحاسب اللي باع واللي خانْ
تعدّ الغُصصْ فـ زُور المساجينْ
وتطبطبْ على قلبْ الغُربا
اللي ناموا لوحدهم فـ البردْ سنينْ
الساعة بتدقّ...
وأنا سامعها بتندهلي باسمي
بتقولي: "الوقت ما بيرحمشْ!"
وأنا ساكتْ...
ومستنيها تدقّ عليّا المرة الجاية!
تعليقات
إرسال تعليق
شاركنا رأيك فى موضوعاتنا .