البنت الحلوة بإسدالها بقلم محسن سمير... محسن الورداني

 

البنت الحلوة بإسدالها

البنت الحلوة بإسدالها...
ماشية بِسكِتها... ف حالها،
لا هَمّهَا مينْ بِصّ وراها،
ولا مينْ قالْ كَلِمَة عَنها!

عينيها ضيّ...
فيها المَدَدْ، فيها الحَنَانْ،
فيها الطّهَرْ، فيها السَّكِينَهْ،
نَظْرَتْها دَفْ، فيها اليَقِينْ،
فيها الرِّضا... فيها الطَّمَأْنينةْ!

وابتسامتها...
حاجة كَأنّ الفَجْر نَادَى،
والنور سَجَدْ تحت الجَبِينْ،
حاجة كأنّ الدُّنيا بَابْ،
فَاتحْ ذِراعُهْ للمؤمِنِينْ!

أما الحَيَا...
فَحِكاية مالهاشْ كَلامْ،
فَطرحِتها... سترٍ وغُصنْ،
بِتقولْ: "أنا ماليشْ مَلامْ،
أنا الفُضُولْ عَندي حَرَامْ!"

والنُّور اللي فِـ وِشْهَا...
شَمْسٍ في عِزّ اللّيل ضَاوِيَهْ،
كأنها فَرْحَة مَلَكْ،
حاطِطْ لها جَنحُه هِدَايَهْ،
كأنها مَسْحَة طُهر،
جايّه مِن رَبِّي لِـ رِضَايَهْ!